ചങ്ങനാശ്ശേരിയിലെ ഒരു കുടുംബത്തിലെ മൂന്ന് പേരുടെ മരണം; ആത്മഹത്യാക്കുറിപ്പ് കണ്ടെത്തി, മൂന്ന് ലക്ഷം രൂപയുടെ കടബാധ്യതയെന്ന് സൂചന

ചങ്ങനാശ്ശേരി: ചങ്ങനാശ്ശേരിയിൽ ഒരു കുടുംബത്തിലെ മൂന്ന് പേരെ വീടിനുള്ളിൽ മരിച്ച നിലയിൽ കണ്ടെത്തിയ സംഭവത്തിൽ ആത്മഹത്യാക്കുറിപ്പ് കണ്ടെത്തി. ചങ്ങനാശ്ശേരി എസ്.ബി. കോളജിന് സമീപം കരിങ്ങട വീട്ടിൽ സാജു ആന്റണി (64), ഭാര്യ അനു (54), മകൻ സബിൻ (34) എന്നിവരാണ് മരിച്ചത്.

മാതാപിതാക്കളായ സാജുവും അനുവും ചേർന്നാണ് ആത്മഹത്യാക്കുറിപ്പ് എഴുതിയതെന്നാണ് വിവരം. മൂന്ന് ലക്ഷം രൂപയുടെ കടബാധ്യതയുണ്ടായിരുന്നുവെന്ന് കുറിപ്പിൽ പരാമർശിക്കുന്നതായാണ് സൂചന.

മാതാപിതാക്കളുടെ മരണം അറിഞ്ഞതിനെത്തുടർന്ന് മകൻ സബിനും ജീവനൊടുക്കിയതാകാമെന്നാണ് പൊലീസിന്റെ പ്രാഥമിക നിഗമനം. എന്നാൽ സംഭവത്തിന്റെ കൃത്യമായ സാഹചര്യങ്ങൾ വ്യക്തമാകേണ്ടതുണ്ട്.

സംഭവത്തിൽ പൊലീസ് അന്വേഷണം തുടരുകയാണ്. ആത്മഹത്യാക്കുറിപ്പിലെ വിവരങ്ങളും മറ്റ് സാഹചര്യങ്ങളും പരിശോധിച്ചുവരികയാണ്.