പുലർച്ചെ 3 മണിവരെ ഡിജെ പാർട്ടി; കൊച്ചിയിലെ പഞ്ചനക്ഷത്ര ഹോട്ടലിനെതിരെ പൊലീസ് നടപടി

കൊച്ചി: അനുവദിച്ച സമയപരിധി ലംഘിച്ച് പുലർച്ചെ മൂന്ന് മണിവരെ ഡിജെ പാർട്ടി നടത്തിയ കൊച്ചിയിലെ പഞ്ചനക്ഷത്ര ഹോട്ടലിനെതിരെ പൊലീസ് കേസെടുത്തു. റാഡിസൺ ബ്ലൂ ഹോട്ടലിനെതിരെയാണ് കടവന്ത്ര പൊലീസ് നടപടി സ്വീകരിച്ചത്.

കൊച്ചി നഗരത്തിൽ രാത്രി 11 മണിവരെയാണ് ഡിജെ പാർട്ടികൾക്ക് അനുമതിയുള്ളത്. എന്നാൽ ഈ സമയപരിധി ലംഘിച്ച് പുലർച്ചെ മൂന്ന് മണിവരെ പരിപാടി നടത്തിയെന്നാണ് കണ്ടെത്തൽ.

പൊലീസ് വേഷം മാറി നടത്തിയ പരിശോധനയിലാണ് നിയമലംഘനം കണ്ടെത്തിയത്. സംഭവത്തിൽ കടവന്ത്ര പൊലീസ് കേസെടുത്ത് തുടർനടപടികൾ ആരംഭിച്ചു.

നിശ്ചിത സമയപരിധി പാലിക്കാതെ ഡിജെ പാർട്ടികൾ നടത്തുന്നതിനെതിരെയുള്ള പൊലീസ് പരിശോധനയുടെ ഭാഗമായാണ് നടപടി.