വിവാഹം കഴിഞ്ഞ് 11-ാം ദിവസം നവവധുവിനെ വീട്ടിൽ മരിച്ച നിലയിൽ കണ്ടെത്തി; ദുരൂഹതയുണ്ടോയെന്ന് അന്വേഷിച്ച് പൊലീസ്

വർക്കല: വിവാഹം കഴിഞ്ഞ് പതിനൊന്നാം ദിവസം നവവധുവിനെ വീട്ടിൽ തൂങ്ങിമരിച്ച നിലയിൽ കണ്ടെത്തി. വർക്കല തച്ചോട് പൈപ്പിൻമൂടിന് സമീപം 'തണൽ' വീട്ടിൽ താമസിച്ചിരുന്ന ജിഷ (30) ആണ് മരിച്ചത്. വെള്ളിയാഴ്ച രാവിലെ 11.30ഓടെയായിരുന്നു സംഭവം.

വീട്ടിനുള്ളിൽ തൂങ്ങിയ നിലയിൽ കണ്ടെത്തിയ ജിഷയെ നാട്ടുകാർ ഉടൻ കയർ അറുത്തുമാറ്റി വർക്കല താലൂക്ക് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

ജിഷയുടെ ആദ്യ ഭർത്താവ് ശരത്ത് ഒന്നര വർഷം മുമ്പ് വിദേശത്തുണ്ടായ വാഹനാപകടത്തിൽ മരിച്ചിരുന്നു. ഈ ബന്ധത്തിൽ എട്ടും അഞ്ചും വയസ്സുള്ള രണ്ട് പെൺമക്കളുണ്ട്.

തുടർന്ന് വർക്കല സ്വദേശിയായ അജി നടേശനുമായി ജിഷയുടെ രണ്ടാം വിവാഹം ഗുരുവായൂർ ക്ഷേത്രത്തിൽ വെച്ച് നടന്നിരുന്നു. വിവാഹശേഷം മക്കൾക്കും ഭർത്താവിനുമൊപ്പം തച്ചോടുള്ള വീട്ടിലായിരുന്നു ജിഷ താമസിച്ചിരുന്നത്. വിവാഹച്ചടങ്ങിൽ ജിഷയുടെ വീട്ടുകാർ പങ്കെടുത്തിരുന്നില്ലെന്നാണ് വിവരം.

വിവാഹം കഴിഞ്ഞ് ദിവസങ്ങൾക്കുള്ളിൽ യുവതി മരിച്ച സംഭവത്തിൽ ദുരൂഹതയുണ്ടോയെന്ന് അയിരൂർ പൊലീസ് അന്വേഷിച്ചുവരികയാണ്. മൃതദേഹം പോസ്റ്റ്‌മോർട്ടം നടപടികൾക്കായി വർക്കല താലൂക്ക് ആശുപത്രിയിൽ സൂക്ഷിച്ചിരിക്കുകയാണ്. പോസ്റ്റ്‌മോർട്ടം റിപ്പോർട്ടിന്റെ അടിസ്ഥാനത്തിൽ തുടർനടപടികൾ സ്വീകരിക്കുമെന്ന് പൊലീസ് അറിയിച്ചു.