കൊല്ലത്ത് ഏഴാം ക്ലാസുകാരനെ കാണാനില്ല; സൈക്കിൾ റെയിൽവേ ‌സ്റ്റേഷനിൽ, വ്യാപക തിരച്ചിൽ.

കൊല്ലത്ത് ഏഴാം ക്ലാസ് വിദ്യാർഥിയെ കാൺമാനില്ലെന്നു പരാതി. കൊല്ലം പട്ടത്താനം വികാസ് നഗറിൽ വാടകയ്ക്കു താമസിക്കുന്ന കൊൽക്കത്ത സ്വദേശികളുടെ മകൻ അബ്രഹാമിനെയാണ് (12) ആണ് വ്യാഴാഴ്‌ച വൈകിട്ടു മുതൽ കാണാതായത്.

കൊല്ലത്തെ ഇംഗ്ലിഷ് മീഡിയം സ്കൂളിൽ പഠിക്കുന്ന വിദ്യാർഥി, സ്കൂൾ വിട്ടു വീട്ടിൽ വന്നശേഷം തന്റെ സൈക്കിളിൽ പുറത്തേക്കു പോകുന്നതിന്റെ ദൃശ്യങ്ങൾ വീടിനു സമീപത്തെ സിസിടിവികളിൽ നിന്നു ലഭിച്ചിട്ടുണ്ട്. കുട്ടിയുടെ സൈക്കിൾ കൊല്ലം റെയിൽവേ സ്റ്റേഷൻ പരിസരത്തു നിന്നു കണ്ടെത്തി. സംഭവത്തിൽ കൊല്ലം ഈസ്റ്റ് കേസ്സെടുത്തിട്ടുണ്ട്.

കഴിഞ്ഞ 3 വർഷത്തിലേറെയായി കുട്ടിയും കുടുംബവും കൊല്ലത്ത് ആണ് താമസിച്ചിരുന്നത്. കഴിഞ്ഞ ഏപ്രിലിൽ കുട്ടിയുടെ അമ്മ ഇളയ കുട്ടിയുമായി കൊൽക്കത്തയിലേക്കു മടങ്ങിയിരുന്നു. അമ്മയുടെ അടുത്തേക്കു പോകുന്നതിനായി കുട്ടി ട്രെയിനിൽ കയറി പോയതാകാമെന്ന നിഗമനത്തിൽ കൊല്ലം റെയിൽവേ സ്റ്റേഷനിലേയും സമീപ പ്രദേശങ്ങളിലേയും സിസിടിവി ദൃശ്യങ്ങൾ അടക്കം പരിശോധിച്ച് അന്വേഷണം പുരോഗമിക്കുകയാണെന്നു പൊലീസ് പറഞ്ഞു. കുട്ടിയെ കണ്ടുകിട്ടുകയോ കണ്ടെത്താൻ സഹായിക്കുന്ന എന്തെങ്കിലും വിവരം ലഭിക്കുകയോ ചെയ്യുന്നവർ താഴെ കാണുന്ന നമ്പറുകളിൽ ബന്ധപ്പെടുക:

കൊല്ലം ഈസ്റ്റ് പൊലീസ് സ്റ്റേഷൻ:

0474 2742072

ബിരേന്ദർ (കുട്ടിയുടെ പിതാവ്):

99956 38154