വീടിന്റെ വാതിലുകളും, ജനലുകളും വരെ വിറ്റ് ജീവിക്കേണ്ടിവന്ന അവസ്ഥയിലായിരുന്ന കുടുംബം

കണ്ണൂർ: കടുത്ത ജീവിതപ്രതിസന്ധികളെത്തുടർന്ന് ദുരിതത്തിലായിരുന്ന ഉഷയും രണ്ട് മക്കളും ചികിത്സയിലൂടെ സാധാരണ ജീവിതത്തിലേക്ക് തിരിച്ചെത്തുന്നതിന്റെ പ്രതീക്ഷാജനകമായ സൂചനകൾ. പരിയാരം ഗവൺമെന്റ് മെഡിക്കൽ കോളേജ് ആശുപത്രിയിൽ ചികിത്സയിൽ കഴിയുന്ന ഇവരുടെ ആരോഗ്യത്തിലും പെരുമാറ്റത്തിലും ഒരാഴ്ചയ്ക്കിടെ പുരോഗതിയുണ്ടായതായി ആശുപത്രി അധികൃതർ അറിയിച്ചു.

തളിപ്പറമ്പ് കൂവോട് സ്വദേശികളായ കുടുംബത്തിന്റെ ദുരിതാവസ്ഥ പുറത്തുവന്നതിനു പിന്നാലെയാണ് സർക്കാർ ഇടപെടലുണ്ടായത്. ഉഷ അർബുദരോഗിയാണ്. മൂത്ത മകൻ മാനസികാരോഗ്യ പ്രശ്നങ്ങൾ നേരിടുന്നയാളും ഇളയ മകന് ഓട്ടിസവുമുണ്ട്. കടുത്ത സാമ്പത്തിക ബുദ്ധിമുട്ടിനെ തുടർന്ന് വീടിന്റെ വാതിലുകളും ജനലുകളും വരെ വിറ്റ് ജീവിക്കേണ്ടിവന്ന അവസ്ഥയിലായിരുന്നു കുടുംബം.

വാർത്ത ശ്രദ്ധയിൽപ്പെട്ടതിനെ തുടർന്ന് മുഖ്യമന്ത്രി ഇടപെടുകയും ജനപ്രതിനിധികളും ജില്ലാ ഭരണകൂടവും നാട്ടുകാരും ചേർന്ന് കുടുംബത്തിന് ചികിത്സയും സഹായവും ഉറപ്പാക്കുകയും ചെയ്തു.

ആശുപത്രിയിലെത്തിയ ആദ്യ ദിവസങ്ങളിൽ ഭക്ഷണവും മരുന്നും സ്വീകരിക്കാൻ മടിച്ചിരുന്ന ഇവർ ഇപ്പോൾ കൃത്യമായി ഭക്ഷണം കഴിക്കുകയും മരുന്നുകൾ സ്വീകരിക്കുകയും ചെയ്യുന്നുണ്ട്. കുളിക്കുക, വസ്ത്രങ്ങൾ കഴുകുക, ആരോഗ്യപ്രവർത്തകരുമായി സംസാരിക്കുക തുടങ്ങിയ കാര്യങ്ങളിലും പുരോഗതിയുണ്ടായി. നൽകിയ കടലാസിൽ സ്വന്തം പേര് എഴുതാനും ചിത്രങ്ങൾ വരയ്ക്കാനും ശ്രമിക്കുന്നതും ചികിത്സാ സംഘത്തിന് പ്രതീക്ഷ നൽകുന്നുണ്ട്.

ചെറിയ കരുതലും സമയോചിതമായ ഇടപെടലും ഒരു കുടുംബത്തിന്റെ ജീവിതത്തിൽ വലിയ മാറ്റമുണ്ടാക്കാമെന്നതിന്റെ ഉദാഹരണമായി മാറുകയാണ് ഈ സംഭവം