ഭാര്യയെ മർദിച്ചെന്ന പരാതിയിൽ അന്വേഷിക്കാനെത്തിയ പോലീസിനെ ആക്രമിച്ചു; പ്രതി അറസ്റ്റിൽ

ഹരിപ്പാട്: ഭാര്യയെ ഉപദ്രവിക്കുന്നതായുള്ള വിവരത്തെത്തുടർന്ന് അന്വേഷിക്കാനെത്തിയ പോലീസിനെ ആക്രമിച്ച കേസിൽ പ്രതി അറസ്റ്റിൽ. കാർത്തികപ്പള്ളി ചെറുതന ശ്യാം നിവാസിൽ ശ്യാംകുമാർ (42) ആണ് വീയപുരം പോലീസിന്റെ പിടിയിലായത്.

ഞായറാഴ്ച രാത്രി ഒൻപതരയോടെയായിരുന്നു സംഭവം. ഭാര്യയെ ഉപദ്രവിക്കുന്നതായി സ്റ്റേഷനിൽ വിവരം ലഭിച്ചതിനെത്തുടർന്നാണ് പോലീസ് സ്ഥലത്തെത്തിയത്. പ്രതിയെ അനുനയിപ്പിച്ച് പോലീസ് ജീപ്പിൽ കയറ്റി സ്റ്റേഷനിലേക്ക് കൊണ്ടുപോകുന്നതിനിടെ ഇയാൾ ഉദ്യോഗസ്ഥരെ ആക്രമിക്കുകയായിരുന്നു.

ജീപ്പിൽ കയറാൻ വിസമ്മതിച്ച പ്രതി ബലപ്രയോഗത്തിനിടെ വീയപുരം പോലീസ് സ്റ്റേഷനിലെ സീനിയർ സിവിൽ പോലീസ് ഓഫീസർ സേതുനാഥിന്റെ വലതുകൈയിലെ ചെറുവിരൽ പിടിച്ചുതിരിച്ചു. സംഭവത്തിൽ ഉദ്യോഗസ്ഥന്റെ വിരലിലെ ലിഗമെന്റിന് പരിക്കേറ്റിട്ടുണ്ട്.

ഔദ്യോഗിക കൃത്യനിർവഹണം തടസ്സപ്പെടുത്തിയതിനാണ് പ്രതിക്കെതിരെ കേസെടുത്തത്. വീയപുരം പോലീസ് അറസ്റ്റ് ചെയ്ത പ്രതിയെ ഹരിപ്പാട് ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതിയിൽ ഹാജരാക്കി റിമാൻഡ് ചെയ്തു.