ചാരുംമൂടിൽ ക്രൂരകൊലപാതകം; ഭാര്യയുടെ അമ്മയെ കുത്തിക്കൊന്ന് മരുമകൻ

ചാരുംമൂട്: ആലപ്പുഴയിലെ ചാരുംമൂട് ഇടക്കുന്നത്ത് ഭാര്യയുടെ അമ്മയെ മരുമകൻ കുത്തിക്കൊന്നു. ഇടക്കുന്നം സ്വദേശിനി ജയകുമാരിയാണ് കൊല്ലപ്പെട്ടത്. ആലപ്പുഴ സ്വദേശിയായ ജോജി ജോസഫാണ് ജയകുമാരിയെ കുത്തിയതെന്നാണ് വിവരം. ഇന്ന് പുലർച്ചെ അഞ്ചുമണിയോടെയായിരുന്നു സംഭവം.

മകൾ അർച്ചനയെ കുത്താൻ ശ്രമിക്കുന്നതിനിടെ തടയാനായി ഇടപെട്ട ജയകുമാരിക്ക് കുത്തേൽക്കുകയായിരുന്നു. ഗുരുതരമായി പരിക്കേറ്റ ജയകുമാരി സമീപത്തെ വീടിന്റെ മുറ്റത്തേക്ക് ഓടിയെത്തിയെങ്കിലും അവിടെ ബോധരഹിതയായി വീണു. ആശുപത്രിയിലേക്ക് കൊണ്ടുപോകുന്നതിനിടെയാണ് മരണം സംഭവിച്ചത്.

സംഭവത്തിനുശേഷം പ്രതി ജോജി ജോസഫ് സ്ഥലത്തുനിന്ന് ഓടി രക്ഷപ്പെട്ടതായാണ് വിവരം. സംഭവമറിഞ്ഞ് നൂറനാട് പൊലീസ് സ്ഥലത്തെത്തി തുടർനടപടികൾ സ്വീകരിച്ചു.

സംഭവത്തിൽ പൊലീസ് അന്വേഷണം തുടരുകയാണ്.