കെ.പി. ഉദയഭാനുവിൻ്റെ പരാതിയിൽ ശ്രീനാദേവി കുഞ്ഞമ്മയ്‌ക്കെതിരെ കേസ്;

പത്തനംതിട്ട: കോൺഗ്രസ് പത്തനംതിട്ട ജില്ലാ പഞ്ചായത്ത് അംഗം ശ്രീനാദേവി കുഞ്ഞമ്മയ്ക്കെതിരെ പൊലീസ് കേസെടുത്തു. സിപിഎം സംസ്ഥാന കമ്മിറ്റിയംഗം കെ.പി. ഉദയഭാനു നൽകിയ പരാതിയിൽ അടൂർ പൊലീസാണ് കേസെടുത്തത്. സമൂഹമാധ്യമങ്ങളിലൂടെ അപകീർത്തിപ്പെടുത്തിയെന്നായിരുന്നു പരാതി.

പൊതുപ്രവർത്തനത്തെ അപകീർത്തിപ്പെടുത്തിയെന്നും ലൈംഗിക അരാജകത്വത്തോടെ ജീവിക്കുന്ന വ്യക്തിയാണെന്ന് ചിത്രീകരിക്കാൻ ശ്രമിച്ചെന്നുമാണ് എഫ്‌ഐആറിൽ പറയുന്നതെന്നാണ് റിപ്പോർട്ട്.

രാഹുൽ മാങ്കൂട്ടത്തിലിനെ കെ.പി. ഉദയഭാനു വിമർശിച്ചതിന് പിന്നാലെയാണ് ശ്രീനാദേവി കുഞ്ഞമ്മയുടെ വിവാദ ഫേസ്ബുക്ക് പോസ്റ്റ് പുറത്തുവന്നത്. ഇതിന് പിന്നാലെയാണ് ഉദയഭാനു പൊലീസിനെ സമീപിച്ചത്.

നേരത്തെ സിപിഐയിലായിരുന്ന ശ്രീനാദേവി കുഞ്ഞമ്മ പിന്നീട് കോൺഗ്രസിലെത്തുകയായിരുന്നു. കേസിൽ പൊലീസ് തുടർനടപടികൾ സ്വീകരിച്ചുവരികയാണ്.