വെർച്വൽ അറസ്റ്റ് ഭീഷണി; വിരമിച്ച ജഡ്ജിയിൽ നിന്ന് 2.5 കോടി തട്ടിയ കേസിൽ മലയാളി അറസ്റ്റിൽ

കൊച്ചി: പുൽവാമ ഹവാല കേസുമായി ബന്ധമുണ്ടെന്ന് ആരോപിച്ച് ‘വെർച്വൽ അറസ്റ്റ്’ ഭീഷണി മുഴക്കി രാജസ്ഥാനിലെ വിരമിച്ച ജഡ്ജിയിൽ നിന്ന് രണ്ടരക്കോടി രൂപ തട്ടിയെടുത്ത കേസിൽ മലയാളി അറസ്റ്റിൽ. എറണാകുളം വരാപ്പുഴ ചിറ്റേറ്റ് സ്വദേശി ആനന്ദ് ബാബു (32) ആണ് പിടിയിലായത്.

രാജസ്ഥാൻ പൊലീസിന്റെ നിർദേശപ്രകാരം കൊച്ചി പൊലീസാണ് നടപടി സ്വീകരിച്ചത്. സെൻട്രൽ എസിപി സിബി ടോമിന്റെ നേതൃത്വത്തിലുള്ള സംഘമാണ് പ്രതിയെ അറസ്റ്റ് ചെയ്തത്.

ഉത്തരേന്ത്യ കേന്ദ്രീകരിച്ച് പ്രവർത്തിക്കുന്ന സൈബർ തട്ടിപ്പ് സംഘത്തിൽ നിന്ന് ആനന്ദ് ബാബുവിന്റെ ബാങ്ക് അക്കൗണ്ടിലേക്ക് അഞ്ച് ലക്ഷം രൂപ എത്തിയതായി അന്വേഷണത്തിൽ കണ്ടെത്തിയിട്ടുണ്ട്. ഈ പണം പിന്നീട് മറ്റ് വ്യക്തികൾക്ക് കൈമാറിയതായും പൊലീസ് കണ്ടെത്തിയതായാണ് റിപ്പോർട്ട്.

സംഭവത്തിൽ കൂടുതൽ മലയാളികൾക്ക് സൈബർ തട്ടിപ്പ് സംഘവുമായി ബന്ധമുണ്ടോയെന്ന കാര്യവും പൊലീസ് പരിശോധിക്കുന്നുണ്ട്. കേസുമായി ബന്ധപ്പെട്ട അന്വേഷണം തുടരുകയാണ്.

എന്താണ് വെർച്വൽ അറസ്റ്റ് തട്ടിപ്പ്?

പൊലീസ്, സിബിഐ തുടങ്ങിയ അന്വേഷണ ഏജൻസികളിലെ ഉദ്യോഗസ്ഥരാണെന്ന് വ്യാജമായി പരിചയപ്പെടുത്തി വീഡിയോ കോളിലൂടെ ആളുകളെ ഭീഷണിപ്പെടുത്തുന്ന സൈബർ തട്ടിപ്പ് രീതിയാണിത്. ഗുരുതരമായ കേസുകളിൽ പ്രതിയാണെന്നും ഉടൻ അറസ്റ്റ് ചെയ്യുമെന്നും പറഞ്ഞ് ഭയപ്പെടുത്തിയാണ് തട്ടിപ്പുകാർ പണം കൈക്കലാക്കുന്നത്. ചില സന്ദർഭങ്ങളിൽ മണിക്കൂറുകളോളം വീഡിയോ കോളിൽ തുടരാൻ നിർബന്ധിച്ചും പണം കൈമാറാൻ സമ്മർദം ചെലുത്താറുണ്ട്.

ശ്രദ്ധിക്കുക: വീഡിയോ കോളിലൂടെ അറസ്റ്റ് പ്രഖ്യാപിച്ച് ഒരാളെ ഔദ്യോഗികമായി വീട്ടുതടങ്കലിലാക്കുന്ന നിയമപരമായ നടപടിക്രമം ഇന്ത്യയിലില്ല. ഇത്തരം കോളുകൾ ലഭിച്ചാൽ പരിഭ്രാന്തരാകാതെ പണം കൈമാറുന്നത് ഒഴിവാക്കുക. സംശയാസ്പദമായ സംഭവങ്ങൾ സൈബർ പൊലീസിനെ അറിയിക്കുക.

സൈബർ സാമ്പത്തിക തട്ടിപ്പിന് ഇരയായാൽ ഉടൻ 1930 എന്ന ദേശീയ സൈബർ ക്രൈം ഹെൽപ്‌ലൈൻ നമ്പറിൽ ബന്ധപ്പെടുക. കൂടാതെ cybercrime.gov.in എന്ന ഔദ്യോഗിക പോർട്ടലിലൂടെയും പരാതി നൽകാം.