പാലയൂർ പള്ളിക്ക് പിന്നാലെ മലയാറ്റൂർ പള്ളിക്കെതിരെയും അവകാശവാദം; വിവാദം

കൊച്ചി: തൃശൂരിലെ പാലയൂർ പള്ളി മുമ്പ് ശിവക്ഷേത്രമായിരുന്നുവെന്ന വാദം വീണ്ടും ചർച്ചയായതിന് പിന്നാലെ, എറണാകുളം ജില്ലയിലെ മലയാറ്റൂർ പള്ളിയും ശിവക്ഷേത്രമായിരുന്നുവെന്ന അവകാശവാദവുമായി ഹിന്ദു ഐക്യവേദി സംസ്ഥാന പ്രസിഡന്റ് ആർ.വി. ബാബു രംഗത്തെത്തി.

പാലയൂർ പള്ളി ക്ഷേത്രമായിരുന്നുവെന്ന വാദം സംഘപരിവാർ അനുകൂല ടെലിവിഷൻ ചാനലായ ജനം ടി.വി. ആവർത്തിച്ചതിനു പിന്നാലെയാണ് മലയാറ്റൂർ പള്ളിയെക്കുറിച്ചും പുതിയ അവകാശവാദം ഉയർന്നത്. മലയാറ്റൂർ കുരിശുമുടി പള്ളി രൂപപ്പെട്ടതിനെക്കുറിച്ച് സാഹിത്യകാരനും മുൻ ഐ.എ.എസ് ഉദ്യോഗസ്ഥനുമായ മലയാറ്റൂർ രാമകൃഷ്ണൻ മാതൃഭൂമി ആഴ്ചപ്പതിപ്പിൽ എഴുതിയിട്ടുണ്ടെന്ന് ആർ.വി. ബാബു നേരത്തെയും അവകാശപ്പെട്ടിരുന്നു. ഇതേ വാദമാണ് അദ്ദേഹം വീണ്ടും ഉന്നയിച്ചിരിക്കുന്നത്.

കേരളത്തിലെ പുരാതന ക്രൈസ്തവ തീർഥാടന കേന്ദ്രങ്ങളെക്കുറിച്ച് ഇത്തരം അവകാശവാദങ്ങൾ ഉയരുന്നത് പുതിയ വിവാദങ്ങൾക്ക് വഴിവെച്ചിരിക്കുകയാണ്. പാലയൂർ, മലയാറ്റൂർ പള്ളികൾക്കു പുറമെ ആലപ്പുഴയിലെ അർത്തുങ്കൽ പള്ളിയെക്കുറിച്ചും സമാനമായ അവകാശവാദങ്ങൾ മുമ്പ് ഉയർന്നിട്ടുണ്ട്.