കേരള സർവകലാശാല നിയമന തട്ടിപ്പ് കേസ്: മുൻ വൈസ് ചാൻസലർ ഉൾപ്പെടെയുള്ളവർക്കെതിരെ പ്രോസിക്യൂഷൻ നടപടിക്ക് നീക്കം

തിരുവനന്തപുരം: കേരള സർവകലാശാലയിലെ അസിസ്റ്റന്റ് നിയമനവുമായി ബന്ധപ്പെട്ട തട്ടിപ്പ് കേസിൽ മുൻ വൈസ് ചാൻസലർ ഉൾപ്പെടെയുള്ളവർക്കെതിരെ പ്രോസിക്യൂഷൻ നടപടികളുമായി ക്രൈംബ്രാഞ്ച് മുന്നോട്ടുപോകുന്നു. കേസിലെ പ്രതികൾക്കെതിരായ കുറ്റപത്രം തയ്യാറായതായും പ്രോസിക്യൂഷൻ അനുമതി തേടി ക്രൈംബ്രാഞ്ച് എഡിജിപി സർക്കാരിന് റിപ്പോർട്ട് നൽകിയതായും റിപ്പോർട്ടുണ്ട്.

നിയമന നടപടികളിൽ ക്രമക്കേട് നടന്നെന്ന ആരോപണവുമായി ബന്ധപ്പെട്ട കേസിൽ മുൻ വൈസ് ചാൻസലർ രാമചന്ദ്രൻ നായർ, മുൻ പ്രോ വൈസ് ചാൻസലർ ജയപ്രകാശ്, രജിസ്ട്രാർ കെ. എ. ഹാഷിം, ചില സിൻഡിക്കേറ്റ് അംഗങ്ങൾ എന്നിവരാണ് പ്രതിപ്പട്ടികയിലുള്ളതെന്ന് റിപ്പോർട്ടിൽ പറയുന്നു.