ലഹരിക്കെതിരെ ബോധവൽക്കരണം നടത്തിയ എസ്.ഐ തന്നെ എംഡിഎംഎ മോഷ്ടിച്ചെന്ന് കേസ്; അറസ്റ്റ്

ലഹരിക്കെതിരെ ബോധവൽക്കരണ പരിപാടികളിൽ സജീവമായിരുന്ന പൊലീസ് ഉദ്യോഗസ്ഥൻ തന്നെ ലഹരിമരുന്ന് മോഷണക്കേസിൽ അറസ്റ്റിലായി. എറണാകുളം സെൻട്രൽ പൊലീസ് സ്റ്റേഷനിലെ എസ്.ഐ അനസ് എസ്. തൗഫീഖാണ് അറസ്റ്റിലായത്.

പൊലീസ് പിടിച്ചെടുത്ത് സ്റ്റേഷനിലെ തെളിവുമുറിയിൽ സൂക്ഷിച്ചിരുന്ന 87.37 ഗ്രാം എംഡിഎംഎ ഇയാൾ കടത്തിയെന്നാണ് കേസ്. ഒക്ടോബർ 18ന് തെളിവുമുറിയിൽനിന്ന് ലഹരിമരുന്ന് അടങ്ങിയ കവർ എടുത്തുകൊണ്ടുപോയതായി അന്വേഷണത്തിൽ കണ്ടെത്തി.

സംഭവം പുറത്തറിയുകയും അന്വേഷണം ആരംഭിക്കുകയും ചെയ്തതോടെ 202 ഗ്രാം എംഡിഎംഎ അടങ്ങിയ മറ്റൊരു കവർ തിരികെ ഏൽപ്പിച്ചതായും റിപ്പോർട്ടുകളുണ്ട്. സംഭവത്തെ തുടർന്ന് ഉദ്യോഗസ്ഥനെ സസ്പെൻഡ് ചെയ്തിരുന്നു. മോഷണത്തിന് പിന്നിലെ കാരണം ഉൾപ്പെടെയുള്ള കാര്യങ്ങളിൽ പൊലീസ് അന്വേഷണം തുടരുകയാണ്.