കണ്ണൂർ ജില്ലാ പഞ്ചായത്ത് ക്രമക്കേട് ആരോപണം: പി.പി. ദിവ്യക്കെതിരെ വിജിലൻസ് അന്വേഷണത്തിന് സർക്കാർ അനുമതി

കണ്ണൂർ: കണ്ണൂർ ജില്ലാ പഞ്ചായത്ത് മുൻ പ്രസിഡന്റും സി.പി.എം നേതാവുമായ പി.പി. ദിവ്യക്കെതിരെ വിജിലൻസ് അന്വേഷണത്തിന് സർക്കാർ അനുമതി നൽകി. ജില്ലാ പഞ്ചായത്ത് പ്രസിഡന്റായിരുന്ന കാലയളവിൽ നടന്നതായി ആരോപിക്കപ്പെടുന്ന ക്രമക്കേടുകളിലാണ് അന്വേഷണം നടത്തുന്നത്.

ടെൻഡർ നടപടികൾ പാലിക്കാതെ കാർട്ടൺ ഇന്ത്യ അലയൻസ് പ്രൈവറ്റ് ലിമിറ്റഡ് എന്ന കമ്പനിക്ക് കരാർ നൽകിയെന്നതാണ് പ്രധാന ആരോപണങ്ങളിലൊന്ന്. പ്രസ്തുത കമ്പനി പി.പി. ദിവ്യയുടെ ബിനാമി സ്ഥാപനമാണെന്നും പരാതിയിൽ ആരോപിക്കുന്നു. ജില്ലാ പഞ്ചായത്തിന് കീഴിലുള്ള സ്കൂളുകളിൽ മോഡുലാർ ശുചിമുറികൾ സ്ഥാപിച്ചതുമായി ബന്ധപ്പെട്ട കരാറുകളിലും ക്രമക്കേട് നടന്നതായി പരാതിയുണ്ട്.

കെ.എസ്.യു ഉപാധ്യക്ഷൻ മുഹമ്മദ് ഷമ്മാസ് നൽകിയ പരാതിയുടെ അടിസ്ഥാനത്തിലാണ് നടപടി. പി.പി. ദിവ്യയുടെയും ഭർത്താവിന്റെയും സ്വത്തുവിവരങ്ങളും അന്വേഷണത്തിന്റെ പരിധിയിൽ വരും. ജില്ലാ പഞ്ചായത്ത് മുൻ സെക്രട്ടറി അബ്ദുൽ ലത്തീഫിനെതിരെയും അന്വേഷണം നടത്തും.

അഴിമതി നിരോധന നിയമത്തിലെ 17(എ) വകുപ്പ് പ്രകാരമാണ് അന്വേഷണത്തിന് സർക്കാർ അനുമതി നൽകിയത്. ആരോപണങ്ങളിൽ വിശദമായ അന്വേഷണം നടത്തി വസ്തുതകൾ കണ്ടെത്തുകയാണ് വിജിലൻസിന്റെ മുന്നിലുള്ളത്.