ചിലയിടങ്ങളിൽ പോലീസ് ഉദ്യോഗസ്ഥ, മറ്റിടങ്ങളിൽ ഇൻകം ടാക്സ് സൂപ്രണ്ടന്റ്

ചിലയിടങ്ങളിൽ പോലീസ് ഉദ്യോഗസ്ഥ, മറ്റിടങ്ങളിൽ ഇൻകം ടാക്സ് സൂപ്രണ്ടന്റ് ഒടുവിൽ തട്ടിപ്പ് റാണി ജ്യോതി കൃഷ്ണ മുണ്ടക്കയം പോലീസിന്റെ പിടിയിൽ.

മുണ്ടക്കയം:മുണ്ടക്കയം 31 മൈലിലെ പ്രൗഢ ഗാംഭീര്യമുള്ള ഇരുനില വീട് ചൂണ്ടിക്കാട്ടി ആളുകളെ വിശ്വസിപ്പിച്ച് നാടകം കളിച്ചു നടന്ന യുവതി ഒടുവിൽ തട്ടിപ്പ് കേസിൽ പോലീസിന്റെ പിടിയിൽ. പുഞ്ചവയൽ സ്വദേശിനി ജ്യോതി കൃഷ്ണയാണ് മുണ്ടക്കയം പോലീസിന്റെ പിടിയിലായത്.

174000 രൂപ തട്ടിയെടുത്ത് ഒളിവിൽ കഴിഞ്ഞിരുന്ന പ്രതിയെ മുണ്ടക്കയം പോലീസ് സ്റ്റേഷൻ എസ്.എച്ച്.ഒ അനന്തു തമ്പിയുടെ നേതൃത്വത്തിലുള്ള സംഘം തന്ത്രപരമായ നീക്കത്തിലൂടെ കൂവപ്പള്ളിയിൽ നിന്നും വളഞ്ഞു പിടിക്കുകയായിരുന്നു.

കഴിഞ്ഞ ദിവസം മുണ്ടക്കയം sbi ബാങ്കിൽ എത്തിയ മുണ്ടക്കയം ചെളിക്കുഴി സ്വദേശിനിയുടെ 1,74,000 രൂപയാണ് ജ്യോതി കൃഷ്ണ വളരെ തന്ത്രപരമായി തട്ടിയെടുത്തത്. “ചെക്ക് പൂരിപ്പിച്ചു തരാം” എന്ന് പറഞ്ഞ് വിശ്വസിപ്പിച്ച് പരാതിക്കാരിയുടെ കയ്യിൽ നിന്നും ചെക്ക് വാങ്ങിയ ഇവർ, സ്വന്തം ബാങ്ക് അക്കൗണ്ട് വിവരങ്ങൾ രേഖപ്പെടുത്തി പണം തട്ടിയെടുക്കുകയായിരുന്നു.

മുണ്ടക്കയം 31 മൈലിലെ ഒരു ഇരുനില വീട് സ്വന്തമാണെന്ന് കാണിച്ച് ആളുകളെ വിശ്വസിപ്പിക്കുന്നതായിരുന്നു ഇവരുടെ തട്ടിപ്പ് രീതി.സൗഹൃദ വലയങ്ങളിൽ ഒരോയിടത്ത് ഒരോ തരം മേൽവിലാസമാണ് ഇവർ ഉപയോഗിച്ചിരുന്നത്. ചിലയിടങ്ങളിൽ തനിക്ക് പോലീസ് ജോലിയാണെന്ന് വിശ്വസിപ്പിക്കുമ്പോൾ, മറ്റുചിലയിടങ്ങളിൽ താൻ ഇൻകം ടാക്സ് സൂപ്രണ്ടന്റ് ആണെന്ന് പറഞ്ഞാണ് ഇരകളെ വീഴ്ത്തിയിരുന്നത്.

പണം അക്കൗണ്ടിലേക്ക് മാറ്റിയ ശേഷം മുങ്ങിയ പ്രതി, പണം തിരികെ നൽകാം എന്ന് പറഞ്ഞ് ദിവസങ്ങളോളം കളിപ്പിക്കുകയായിരുന്നു. പോലീസ് സ്റ്റേഷനിൽ ഹാജരാകാൻ ആവശ്യപ്പെട്ടിട്ടും നിരന്തരം ഒഴിഞ്ഞുമാറി നടന്നതോടെയാണ് പോലീസ് കർശന നടപടിയിലേക്ക് കടന്നത്.

സമാനമായ രീതിയിൽ ഇവർ വേറെയും പലരിൽ നിന്നും പണം തട്ടിയിട്ടുണ്ടെന്നാണ് ലഭിക്കുന്ന വിവരം. പ്രതിയെ റിമാൻഡ് ചെയ്തു.