35 കിലോയോളം തൂക്കമുള്ള ഭീമൻ കപ്പ; കൗതുകമായി കർഷകന്റെ വിളവ്

മംഗലംഡാം: കടപ്പാറ ചിറയത്ത് ജോസിന്റെ പുരയിടത്തിൽ വിളവെടുത്ത 35 കിലോയോളം തൂക്കം വരുന്ന ഭീമൻ കപ്പ കൗതുകമാകുന്നു. വീടിനോടു ചേർന്ന സ്ഥലത്ത് നട്ട 10 മൂട് കപ്പയിൽ നിന്നാണ് അസാധാരണമായ വിളവ് ലഭിച്ചത്.

ഇതുവരെ വിളവെടുത്ത മൂടുകളിൽ നിന്നെല്ലാം 25 മുതൽ 30 കിലോ വരെ കപ്പ ലഭിച്ചതായി വീട്ടുകാർ പറയുന്നു. മികച്ച വിളവ് ലഭിക്കുന്നതിനാൽ ഒരേസമയം മുഴുവൻ കപ്പയും വിളവെടുക്കാറില്ല. വീട്ടാവശ്യത്തിനായി ഒരു മൂടിൽ നിന്ന് ഒന്നോ രണ്ടോ കപ്പ വീതം ഇളക്കിയെടുക്കുകയാണ് പതിവ്. ഒരെണ്ണം തീരുമ്പോൾ അടുത്ത മൂടിൽ നിന്ന് കപ്പ മാന്തിയെടുക്കും.

അതിനിടെ വീട്ടിലെത്തിയ ബന്ധുക്കൾക്ക് കൂടി നൽകുന്നതിനായി ഒരു മൂട് പൂർണമായി ഇളക്കിയപ്പോഴാണ് അസാധാരണ വലിപ്പമുള്ള കപ്പ ശ്രദ്ധയിൽപ്പെട്ടത്. ഏകദേശം 35 കിലോയോളം തൂക്കമുള്ള കപ്പ കണ്ട് വീട്ടുകാരും ബന്ധുക്കളും അത്ഭുതപ്പെട്ടു.

മൂപ്പെത്തിയ വേളാങ്കി ഇനത്തിൽപ്പെട്ട കപ്പയാണ് ഇതെന്ന് ജോസ് പറഞ്ഞു. മുൻവർഷങ്ങളിൽ ഉണ്ടായിരുന്ന കപ്പത്തണ്ട് മുറിച്ചുനട്ടാണ് ഇത്തവണ കൃഷി ചെയ്തത്. മണ്ണ് നന്നായി ആഴത്തിൽ കൊത്തിയിളക്കി തടമെടുത്ത് നട്ടതല്ലാതെ രാസവളങ്ങളോ മറ്റ് വളങ്ങളോ ഉപയോഗിച്ചിട്ടില്ലെന്നും ജോസ് വ്യക്തമാക്കി.

പ്രത്യേക പരിചരണമോ രാസവളപ്രയോഗമോ ഇല്ലാതെ ലഭിച്ച മികച്ച വിളവ് നാട്ടുകാർക്കിടയിലും കൗതുകമാകുകയാണ്.